Министерството за надворешни работи на Украина го поздравува изнесувањето на заедничката изјава „За последиците од нестабилната енергетска инфраструктура, која е критично важна за безбедноста и сигурноста на нуклеарните електрани во Украина“ на седницата на Управниот совет на МААЕ на 20 ноември.
Изјавата ја поддржаа 56 држави – членки на Агенцијата од различни региони во светот, вклучително и САД, што уште еднаш ја потврдува универзалноста на позицијата на меѓународната заедница во однос на ризиците за нуклеарната безбедност како последица од руските напади врз енергетската инфраструктура на Украина. Им сме благодарни на сите држави што ја поддржаа изјавата за нивната солидарност.
Во заедничката изјава со право се нагласува дека сигурното надворешно енергоснебдување е клучен предуслов за обезбедување на нуклеарната безбедност на нуклеарните електрани. Насочените руски ракетни и дрон-удари врз високонапонските електроподстаници, кои МААЕ ги идентификуваше како критични за гарантираното надворешно енергоснебдување на украинските нуклеарни електрани, се неприфатливи.
Руските напади врз споменатите подстаници не само што ја дестабилизираат енергетската система на Украина, туку свесно ги отстрануваат нивоата на резервирање што се основа на принципот на „длабоко ешалонирана заштита“ во нуклеарната безбедност. Државата-агресор настојува да ги лиши украинските нуклеарни електрани од повеќе последователни нивоа на заштита, ограничувајќи го просторот за безбедна реакција на операторите во вонредни ситуации. Ова претставува свесно создавање закани за нуклеарни инциденти со прекугранични последици од страна на руските терористи.
Реагирајќи на заедничката изјава на 56-те држави – членки на МААЕ по завршувањето на седницата на Управниот совет, министерот за надворешни работи на Украина Андриј Сибигa потенцираше дека принципиелната меѓународна позиција придонесува за спречување на понатамошна ескалација, заштита на глобалниот режим на нуклеарна безбедност и зголемување на политичката цена за непромислените обиди на Русија да ги претвори енергетските и нуклеарните ризици во оружје.
Министерството за надворешни работи на Украина високо ја цени решителната поддршка на меѓународните партнери на платформата на МААЕ и очекува понатамошно зајакнување на широката коалиција држави кои доследно бараат запирање на руските напади врз критичната енергетска инфраструктура на Украина. Украина ги повикува сојузниците и понатаму да го засилуваат меѓународниот притисок врз државата-агресор за да ја принудат да го прекине нуклеарниот уценувачки притисок, да ги почитува меѓународно-правните обврски и да ја врати Запорожската нуклеарна електрана под контрола на нејзиниот легитимен сопственик – Украина. Ова е единствениот пат да се обнови безбедноста, да се спречи нуклеарна катастрофа и да се гарантира почитување на основните принципи на глобалната нуклеарна безбедност.